لاحظت2-رأي سياسي واحد

-جسر الرئيس: يلا، المحطة الأولى و الأخيرة بكل مشوار , و الصبح بتنزل من المكرو, رح تشوف طلاب مدارس عم يلبسوا القميص, ملبكين بالشناتي, عم يخبوا بواكيتون , طلاب جامعة مساطر و مرايل و كتب، و الكل بدو يعبر عن ذاته , بياعين دخان و وحدات، و زبون لئيم، شوفرية المكاري المصحصحين و الركاب نعسانين، صوت فيروز من كل البسطات أعلى صوت رح تسمعه من بسطة الكتب، بياع قهوة يلي بتشرب قهوته غصباً و الدرج المكسر، و الختيار النايم و قدامه علبة، عازف عود، هون رح تضطر تشيل السماعات لتسمع صوت فيروز و العود و أصوات الطلاب المتمردة و الموظف يلي عم يعمل حساباته و الشوفير يلي عم ينادي، لتسمع هالمزيج المتكامل و تحس حالك منتمي.. و المسا، روح الصبح راحت, الختيار راح و العود راح و الطلاب ببيوتها, و صفيت أنت و 200 منتظر و 3 مكاري, رح تحس كل الموجودين برأي سياسي واحد, رح تنتظر عهديك الزاوية , و أكيد لك إستراتيجيات بصيد المكاري, و اذا طلعت ,رح تبتسم، قد ما كان يومك بشع، بس الشوفير رح ينزعلك الإبتسامة لما يقلك على التسعيرة الجديدة أما عن رحلة المكرو فهي موال من نوع اخر. ____________________